കേരളത്തിൽ ഇരിങ്ങാലക്കുടക്ക് അടുത്ത് മുരിയാട് എന്ന സ്ഥലത്തു പ്രവർത്തിക്കുന്ന സീയോൻ എന്നറിയപ്പെടുന്ന എമ്പറർ ഇമ്മാനുവേൽ എന്ന കൾട്ടിന്റെ പ്രവർത്തനങ്ങൾ നിഗൂഢവും സാമൂഹ്യ വിരുദ്ധവും ആയിരുന്നിട്ടും, അവരെ പറ്റി നിരവധി ക്രിമിനൽ പരാതികൾ ലഭിച്ചിട്ടും, അവരുടെ പണത്തിന്റെ ബലവും രാഷ്ട്രീയ സ്വാധീനവും കൊണ്ട് നാളിതുവരെ ഇവിടെ ഭരിക്കുന്ന സർക്കാർ ഒരു അന്വേഷണം നടത്താൻ മുതിർന്നിട്ടില്ല.
അതുകൊണ്ടു തന്നെ ഈ കൂട്ടരുടെ ദാർഷ്ട്യം വർത്തിക്കുകയും കുറ്റകൃത്യങ്ങളുടെ എണ്ണം നാൾക്കു നാൾ കൂടുകയും ചെയ്തുവരുന്നു! അവരുടെ കൂടാരത്തിൽ അബദ്ധത്തിൽ എത്തപ്പെട്ടു അവരുടെ അധോലോക പ്രവർത്തനങ്ങൾ കണ്ടു ഭയന്ന്, പുറത്തുപോയവരെ വേട്ടയാടുന്ന രീതിതന്നെ അധോലോക രീതിയിലാണ്!
നാടിനെയും നാട്ടുകാരെയും തെറ്റിദ്ധരിപ്പിക്കാൻ അവർ യേശുകർത്താവിന്റെയും പരിശുദ്ധ മാതാവിന്റെയും ഫോട്ടോകൾ കാണിച്ചു ഒരു ക്രൈസ്തവ സഭയാണെന്നു ജനങ്ങളെ തെറ്റിദ്ധരിപ്പിച്ചുകൊണ്ടിരിക്കുന്നു! അവരുടെ വേഷവും ഭാഷയും കണ്ടു ഇവർ ഒരു ക്രൈസ്തവ ആത്യാത്മിക സംഘമാണെന്ന് കരുതി പലരും ഇവരുടെ ഗ്രൂപ്പിൽ ചേരുകയും അവരുടെ അടിമത്തത്തിൽ ആകുകയും ചെയ്യുന്നു. എന്നാൽ ഇവരുടെ കൂട്ടത്തിൽ എത്തപ്പെട്ട അറിവും ബോധവുമുള്ള അനേകർ ഇവരുടെ വ്യാജമായ പ്രബോധനങ്ങളും ക്രൂരമായ രീതികളും കണ്ടു ഇവരിൽനിന്ന് രക്ഷപെട്ടതായും കാണുന്നു.
അടുത്ത കാലത്തു ഇവരിൽ നിന്ന് രക്ഷപെട്ടവരിൽ ഇവരുടെ കൂടാരത്തിൽ വളരെ പ്രധാന സ്ഥാനത്തുണ്ടായിരുന്ന അജിൽ മാത്യു എന്ന യുവാവ് ഉൾപ്പെടുന്നു. ഇവരിൽനിന്ന് പുറത്തുവന്ന അജിൽ അവിടെ നടമാടുന്ന അനേകം ദുഷ്പ്രവർത്തികൾ വെളിച്ചത്തു കൊണ്ടുവരുകയും അത് അവരെ കോപാകുലരാക്കുകയും ചെയ്തതിനാൽ അജിൽ മാത്യുവിനെ കഞ്ചാവ് കേസിൽ പിടിപ്പിക്കാൻ ഇവർ നടത്തിയ ഗൂഢാലോചനയാണ് കർണാടക പോലീസ് പൊളിച്ചത്!
എമ്പറർ ഇമ്മാനുവേൽ സ്ഥാപനത്തിൽ കേന്ദ്ര അന്വേഷണ ഏജൻസി (NIA) അന്വേഷണം നടത്താൻ പോകുന്നു എന്നു കേൾക്കുന്ന വാർത്ത സാധാരണക്കാരായ ജനങ്ങൾക്ക് ആശ്വാസപ്രദമാണ്! നിഷ്പക്ഷവും സത്യസന്ധവുമായ ഒരു അന്വേഷണം NIA നടത്തിയാൽ അവിടെ നടന്നിട്ടുള്ളതും നടക്കുന്നതുമായ ഞെട്ടിപ്പിക്കുന്ന പല വസ്തുതകളും പുറത്തുവരും. അതോടൊപ്പം ഇവരുടെ കൈവശമുള്ള കണക്കിൽ പെടാത്ത കോടാകോടി രൂപയും!
